No0oly96’s Weblog

Archive for سبتمبر 2008


وصلني بريد من مجموعة ابو نواف البريديه عن اعمال الحمله الرقابيه للغذاء في محافظة المجمعه


تحت شعار ->>


ليته يتعمم على كامل مناطق المملكه

للي له نظر يشوف التقرير :

تقرير مصور : الحمله الرقابيه للغذاء


ما اقول الا الله يجازيهم الف خيــــر .

Advertisements

** رحلتي للدمام عبر الخطوط الجويه السعوديه**

( نعتز بخدمتكم ) 🙂

اخر رحله للدمام كان المتفق عليه اني اروح انا وفيصولي بالطياره قبل اهلي بيوم ..

وكان ذاك اليوم يوم الاثنين قمت الظهر تجهزت ورحت ابركب بالسياره يوم ركبت والاقي اختي العزيزه ميمو راكبه قبلي

قلت: وش ذا الاكشن جايه تودعيننا؟! .. قالت : لا ابروح معكم !.

<<- تقول امرنا لله 😦

ورحنا للمطار وحجزنا للمزيونه ( بعد معاملات .. وانتظار )

توجهنا لصالة المغادره وحنا 3 اشخاص ؟!

وبعدها على بوابة صعود الطائره .. وركبنا في سلام وامان ..

<<- ماربطت حزام الامان ( فيس يطير حواجبه )

كل مامرت المضيفه فليت اكبر جريده يقالي متحمسه ولا انتبهت

بصراحه الحزام يحشر 🙂

من زين حظي صار مقعدي عند باب الطوارئ وجت المضيفه وقرقت على كلام طويــــــــــل وعطتن سبع طعش الف منشور بالصور عن كيفية التصرف في حالات الطوارئ .

واقلعت الطائره بسلام …

ترتيبنا بالطياره ->>

انا اللي عند الدريشه 😀

طبعا ميمو كل شوي طابتن بحجري تويق ودي ادري وش تبي تشوف المشكله اننا نشوف الجناح

لا عاد يا هالمنظر الفاتن اللي بنشوفه ما غير نفدان الدهنا


بعد 20 -30 د وصلنا على طوووووووول فتحت الجوال دقيت على ابوي وقلتله بالحرف الواحد ( وصلت صاحبة السمو ) <<- دايم اقولها 🙂

ما يحتاج اقولكم ان اللي وراي تسدحو ضحك

عاااادي ما عبرتهم <<- فيس ابو نظارات

نزلنا من الطياره واستقبلونا رجال الامن البواسل <<- حافظته من الاخبار

وجهونا للبوابات ونزلنا بالدرج الكهربائي وبنهاية الدرج دخلت عباة ميمو بالطرف المعدني ( ورطـــه )

واجيكم انا يالفزعه وامسك عباتها من تحت واشق اللي نشب

صرت كاني ابو ابراهيم بياع القماش اللي باب الحاره

<<- متأثره

وصارت عباتها تضحك زي عباتي يوم نعتمر قبل كم سنه<<- يبيلها موضوع لحالها

وبعد ربع ساعه جاء عمر يستقبلنا ورحنا للبيت

وخلصت سالفت المطار ..

**********

لفت انتباهي من تالي ان كثير من السواليف ( تتمحور ) <<- قويـــــه

حول الصفات الشخصيه .. يعني يجيكم شخص يسولف عن نفسه وغالباً

ما تبدء السالفه بـ ( انا من النوع اللي … الخ )

اذكر مره من المرارير نسولف عن انواع المربيات وحده من البنات قالت:

انا من النوع اللي ما اكل المربيات ما عدا الفراوله والكرز .

يعني افهم من هذا اني اذا جيت اعزمها وابقلطلها نواشف ما احط

الى مربى فراوله وكرز ؟!

و يعني هالكلام من باب ” اياك اعني واسمعي ياجاره ”

لهدرجه قضت السوالف وما بقى الا التفطن ؟! وش نحب وش نكره ؟


هذا مقطع من دردشه مفترض وهو الغالب على السوالف في الوقت الحالي :

تدور بين بنتين (&_$)

& : انا من النوع اللي اذا شربت القهوه ما انام .

$ : لا انا لو اشرب ( دله ) نمت كاني شاربه ماء .

& : على طاري الماء تصدقين اني ما اشرب الا كاس ماء باليوم !

$ : اجل انتي بعيدة عن انا لازم اشرب 6 اكواب ماء .

وهالما جرى …


_ تراي انا من النوع اللي ازعل اذا ماشفت تعليقاتكم 🙂 <<- هع


فيه نظريه طرحها الاخ موليكيلو عن التعدد الفكري

نظرية عبد الرزاق

طبعا انا اييد هالنظريه وادعمها ..



( معاً .. لعالم متعدد فكرياً )

مراااااااااااااحب .. ع الكل ..

طبعاً يوم استلام الوثيقه .. يوم يمر مره وحده بالحياة (زي يوم العرس خخخخخ)

ما يحتاج اقولكم اني من الحماس مواصله .. وبعد قررت اخذ اختي معي <<- حركات منــووول يوم الشهادات = اختي + ثوب العيد+سلة حلاو نوزعه على الابلات 🙂


وكعادة اي يوم فيه قومة صبح سؤال يبطح نفسه ( وش البس ؟) 😦

يقالي متخرجه وموب لابسه تنورة الكليه 😀

واستقريت على تنوره جنز و بلوزه قطنيه بلون الجيش <- كشخخخخه هع

وصارت الساعه 10:30 ركبت السياره ورحت للكليه

وطول الطريق وانا تمر قدام عيوني انواع الاحداث اللي صارت على مدى اربع سنوات

ويوم وصلت الى بوابة الكليه فيه كم عامل يصبغون شخابيط عيال الحاره اللي على الجدران

واثنين من البوابين يتقهوون ويفصفصون الجرايد

دخلت الساحه فاااااضيه وتخرررع مشيت على طول للمبنى الاداري

حصلت الغرف مفتحه والمكاتب مفككات دروجها وكنبات الاجتماعات مقلبات والملفات في كل محل قلت لا يصيرون هاجمين حراميه على الكليه عز الله راحت علي الوثيقه

بعدين فكرت قلت يمكن صيانه خل اروح لمبنى أ يمكن احصل احد

رحت للمبنى مالقيت غي صطول بويه وعصيان وجدران مهدمات دخلت بس ابطل على الساحه قلت يمكن اشوف وش السالفه لقيت لمبات الدور الثاني مولعات بس خفـــــــت وهجيت كنت ابطلع برى بس سمعت صوت مكيف حدى غرف مبنى ب قلت خل اشيك يمكن الاقي احد .. يوم وصلت باب المبنى الا طلعلي احد .. توقعوا مين ؟؟

وحده من صديقاتي جايه تاخذ وثيقتها مثلي ( وقسمن ماتواعدنا  )

سلمت عليها ( تقدرون تقولون بحراره )

وكان معها موظفه من موظفات الشؤون .. قلتلها ابي استلم الوثيقه قالت روحي لاستاذه ……..

دخلت وقابلتني احسن دكتوره بالعالم د. سعديه (L) وسلمت علي ومطختن ..

ودخلت عن استاذه …… وعطتن سجل كبييير من الحماس احس انه طولي قالت عبي البيانات من مكان الميلاد وجاي

و وقعت وظفيت ملفي وطلعت

وانتهى يوم الوثيقه بسلاااااااام


عاد هذي هديه من ماما

مدخل :{ يا رمضان الماء العذب
ويا غيثا يقطر املاً حلواً
ونشيدا سحريا في افواه الاطفال ..

رمضـــــان



مبــــارك عليكم الشهر الفضيل ..


اهلي توقعوا انه يكون اول ايام رمضان يوم الاحد الا انا ؟!

توقعوا ليش ؟؟

سلمكم الله عشان كنت ابروح يوم الاحد استلم وثيقتي .. وماودي اروح وانا صايمه 🙂

على طاري رمضان .. جاني بريد طريقه سهله لختم القرآن بالشهر الكريم ومكتوبه باللهجه المصريه <<- عملية اقناع مكشوقه (H)

وهي عباره انك كل يوم تقرون جزء وبالتفصيل يعني بعد كل صلاة وجهين .

اعتبر هذه الطريقه للمبتدئين .. انا طلعت طريقه حلوه وهي انكم تختمون اربع مرات بالشهر بحيث كل يوم تقرأ خمس اجزاء (وعن تجربه من قبل ) اتمنى انكم تجربونها ..

~،.وكــــل عام وانتم بخـــــــير.،~

هــلالــك هــل

مخرج :

رمضان جئتإليــنا
تحنو سماك علينا
أهلاً ../ قدمت ومرحبا
سقنا إليك حنينا
رمضان .. ليتك دائم
فيك الثوابجنينا
لكي نفوز بجنـة
هبة الكــريم إلينا..}

سلام عد الحروف ..

صراحة ما قررت ابدء بالتدوين قبل العيد بس لخاطر عيون to0op

قررت ابدا التدوين (في هذا اليوم المبارك) <<- افتتاحيةمحطة التحليه  🙂

ونفتح طباقة القلم — تصفيق —


أغنيات ،،

سبتمبر 2008
س د ن ث ع خ ج
« أغسطس   أكتوبر »
 12345
6789101112
13141516171819
20212223242526
27282930  

المتواجدون ..

tracker

عدد الزوار

free counter

~

125_11219409300

I care

من أج ــلــღـــم ..

      

اكتب عنوان البريد الإلكتروني لمتابعة هذه المدونة واستلام تنبيهات التدوينات الجديدة بالبريد الإلكتروني.

انضم 3 متابعون آخرين

Smoking Killeing you

stopsmoking

Twitter

Advertisements